Glóðheitur sethúsamarknaður

At húsaprísirnir hækka kemst fyrst og fremst av, at eftirspurningurin eftir bústøðum í løtuni er størri enn útboðið.

Harafturat er lága rentan ein av orsøkunum til høga prísstigið, tí lágu renturnar gera tað lutfalsliga bíligt at gjalda rentur og avdráttir av eini stórari skuld.

Hyggja vit nærri at húsasølunum farna árið, síggja vit, at 376 sethús vóru seld í fríari sølu í fjør. Tað er bert í 2015, at talið av húsasølum var hægri enn í fjør.

Tað er í smærru bygdunum, at vøksturin er størstur. Í 2020 vóru 146 ognir seldar í smærru bygdunum. Men yvirskipað sæst ein vøkstur kring alt landið.

Hyggja vit at miðalprísinum á sølunum og gongdini har, síggja vit eisini eina yvirskipaða príshækking. Í Havn eru prísirnir hægstir. 3,3 milliónir krónur í miðal í 2020.

Tað er samanborið við 2,5 milliónir krónur í 2016. Men eisini uttan fyri Havnina sæst ein príshækking. Í fjør kostaði eitt sethús 1,3 millión í smærru bygdunum og 1,6 í størri bygdum og býum.

Tað er ein stór hækking samanborið við tølini í 2016. Tølini fyri fyrsta ársfjórðing í 2021 vísa, at sethúsaprísirnir halda fram við at hækka.

Sandoyggin er eitt av teimum støðunum, har sethúsaprísirnir eru eksploderaðir seinastu tíðina. Fleiri dømi eru um hús, sum vera seld fyri tvær ella tríggjar ferðir tað, tey kostaðu fyri 10 árum síðani.

Tað eru avbjóðingar við heita sethúsamarknaðinum. Í 2020 øktust sethúsaprísirnir meira enn inntøkurnar hjá føroyingum, og tað eru vandar við tí gongdini, sigur Landsbankin.