Grikkaland leingir arbeiðsvikuna

Fleiri lond, eisini Føroyar, tosa um at stytta arbeiðsvikuna, men í Grikkalandi ganga tey beint ímóti streyminum.

Tí í gjár kom ein skipan við seks arbeiðsdøgum í vikuni - tilsamans 48 tímar - í gildi í Grikkalandi, skrivar enski miðilin The Guardian.

Longda arbeiðsvikan rakar bert privata geiran, og er í útgangsstøðinum bert galdandi fyri privatar fyritøkur, sum veita tænastur alt samdøgrið.

Sætti arbeiðsdagurin er partur av eini nýggjari arbeiðslóggávu, sum var samtykt í fjør, og sum gevur arbeiðsgevarum rætt til at áleggja starvsfólki ein arbeiðsdag aftrat um vikuna fyri 40 prosent aftrat vanligu dagslønini.

Fólkatalið minkar

Sambært lóggevarunum er hetta eitt neyðugt stig at taka, tí fólkatalið minkar, og trot er á faklærdari arbeiðsmegi.

Avleiðingarnar av stóru kreppuni í Grikkalandi í 2009 merkjast nú eisini, tí kreppan fekk umleið 500.000 ungar útbúnar grikkar at flyta í onnur lond.

Fakfeløgini hava ikki tikið væl ímóti broytingini, og hava kallað avgerðina hjá tinginum at leingja arbeiðsvikuna "barbariska".

Grikkar hava longu sum er longstu arbeiðsviku í Evropa.

Sambært Eurostat, sum er hagtalsstovnurin hjá ES, arbeiða grikkar í miðal 41 tímar um vikuna, men fáa væl minni í løn enn í flestu øðrum ES-londum.