74 Rynkeby-súkklarar úr Føroyum

Í dag súkklar Team Rynkeby seinasta túrin í Føroyum, áðrenn farið verður av landinum við Norrønu í nátt.

Tey skulu súkkla úr Danmark til París frá 29. juni til 6. juli.

Ferðin byrjaði fyrrapartin í Klaksvík kl.10.30 og endar í Havn kl.19.20. 

Steðgað verður í nøkrum støðum í Eysturoynni og Streymoynni á leiðini.

74 súkklarar

Á facebooksíðuni hjá Team Rynkeby Føroyar stendur, at í ár eru 74 súkklarar og 21 hjálparfólk við á Team Rynkeby. Tilsamans 95 fólk.

Talan er um trý lið. Tey eru Team Rynkeby Føroyar, Team Rynkeby Sornfelli, og eitt altjóða lið, sum byrjar túrin í Barcelona.

Hetta er 11. árið, at Team Rynkeby Føroyar hevur lið, sum súkklar til París. 

Í fjør gav súkklingin hjá Team Rynkeby Føroyar eina millión og 715.000 krónur, og er tað mesta, sum Team Rynkeby Føroyar hevur savnað.

Endamálið er at vekja áhuga og stuðla børnum, ið eru rakt av krabbameini og øðrum álvarsligum sjúkum.