Stoltenberg hitti amerikanska forsetan

Í gjárkvøldið okkara tíð hitti Jens Stoltenberg, aðalskrivari í Nato, amerikanska forsetan Joe Biden í Washington.

Stoltenberg kunnaði Biden um, at 23 lond í verjusamgonguni nú røkka málinum at brúka í minsta lagi tvey prosent av bruttotjóðarúrtøkuni til verju.

Eftir fundin segði Stoltenberg við fjølmiðlar, at tað er framvegis avgerandi fyri trygdina og støðufestið í Evropa, at USA er á evropiska meginlandinum. 

Evropa ger meira

Men evropearar gera nógv meira fyri felags trygdina, enn fyri bara fáum árum síðani, segði hann. 

- Evropearar standa á odda fyri stríðsbólkum í eystara parti av samgonguni. Tey hava styrkt tilbúgvingina hjá herdeildunum. Og tey hava styrkt Nato við sera dugnaligum finskum og svenskum herfólki, sum koma upp í okkara verjusamgongu, segði Jens Stoltenberg, Nato-aðalskrivari, við fjølmiðlar eftir fundin við Joe Biden, forseta.