Trump: Veruligi dómurin kemur á forsetavalinum

- Veruligi dómurin verður sagdur 5. novembur, og hann kemur frá fólkinum.

Tað segði fyrrverandi amerikanski forsetin, Donald Trump, eftir at eitt nevningating í gjár hevði dømt hann sekan í øllum teimum 34 málunum, hann var ákærdur í, í sonevnda hússj-málinum.

Hann er dømdur fyri at hava falsað skjøl, fyri at fjala yvir eitt útgjald uppá 130 túsund dollarar - umleið 900 túsund krónur - til eina fyrrverandi porno-sjónleikarinnu, Stormy Daniels, undan forseta valinum í 2016.

Revsingin kemur 11. juli

Tað eru løgfrøðiligu dómararnir í málinum, sum skulu avgera, hvørja revsing Trump skal hava.

Tá Trump tosaði við miðlar beint eftir dómin, ákærdi hann bæði dómaran, rættarmálið og nevningatingið fyri at vera korrupt.

Hann segði, at veruligi dómurin kemur 5. novembur frá fólkinum, og sipaði til amerikanska forsetavalið, sum verður tá.

Revsingarásetingin verður 11. juli.