Strika skuld hjá SAS fyri eina mia. kr.

Flogfelagið SAS er í holt við eina risastóra spariætlan, og í dag var boðað frá, at felagið hevur gjørt avtalu við eitt svenskt leasingfelag, um at tað strikar skuld fyri eina milliard svenskar krónur, skrivar Ritzau.

SAS hevur fyrr boðað frá, at ætlanin er at spara 7,5 milliardir svenskar krónur, tað svarar til knappar fimm milliardir danskar.

Flogfelagið er í løtuni í gongd við tað, sum verður rópt ein "chapter 11"-ætlan í USA. Hetta er eitt slag av húsagangsverju, har ein dómari leiðir samráðingar við kreditorarnar, sum so fáa í boði at strika ein part av skuldini og fáa útgoldið tað, sum er eftir.

SAS hevur havt hall seinastu 12 ársfjórðingar. Bara í november í fjør misti felagið 340 milliónir krónur.