David fann grótbræðing á Mars

Tá ið rúmdarbilurin Perseverance fór at kanna botnin í goskoppinum Jezero á Mars, vóru granskararnir fullvísir í, at talan fór at verða um legugrýti, sum fyri milliardum av árum síðani hevði lagt seg á botnin í einum vatnið, ið tá var til har. Men so var ikki. 

Mars landslagið har Perseverance koyrir

Landslagið á Mars, har sum rovarin Perseverance koyrir. (Mynd: NASA/JPL-Caltech/MSSS)

Tá ið føroyingurin David Arge Klevang Pedersen og hansara toymið skannaðu botnin við tólinum PIXL, vísti úrslitið nakað heilt annað.

- Vit kundu staðfesta at talan ikki var um legugrýti, men grótbræðing, greiðir David frá.

Lurta eftir samrøðuni, har David Arge Klevang Pedersen greiðir frá, hvussu tað gongu uppi á Mars.

Tí vóru tey noydd at sannføra allar jarðfrøðingarnar um, at talan var um grótbræðing, ið, sum tað sær út til, hevur spríkt upp úr undirgrundini á Mars.

- Tað sæst í hesum gróti, at saltvatn einaferð hevur verið til staðar, sigur David.

Og tað at tað einaferð hevur verið saltvatn í Jezero goskoppinum, gevur vónir um, at tá ið tey koma har til, sum legugrýti er, er møguleikin fyri at tey finna fyrndargamlar steinrunnar Stromatolittar. Prógv um fyrndargamalt lív. 

Stromatolit á Jørðini

Soleiðis síggja Stromatolittar út á jørðini. Granskarar halda, at hetta einfalda lívið einaferð treivst uppi á Mars, og at tað ið dag møguliga finnast steinrenningar av fyrndargomlum Stromatolittum í undirgrundini. 

Stromatolit steinrenning

Steinrunnin Stromatolittur funnin á jørðini. Nakað líknandi vóna tey at finna uppi á Mars. 

David Arge Klevand Pedersen

David Arge Klevang Pedersen