Russar skrúva fyri gassinum til Týsklands og Fraklands

Russiska orkufelagið, Gazprom, stongdi í nátt fyri gassinum til Týsklands, sum landið fekk gjøgnum gassleiðingina, Nord Stream 1.

Gazprom boðaði frá avgerðini herfyri, og orsøkin er, at leiðingin skal umvælast, vóru boðini til Týsklands.

Tað var russiska tíðindastovan, Tass, sum boðaði frá, at gassleiðingin var latin aftur í morgun.

Reuters hevur fyrr skrivað, at Nord Stream 1 verður stongdur í trý samdøgur, frá í dag til 3. september.

Góðtaka ikki russisku avgerðina

Týskir politikarar góðtaka ikki, at Russland skrúva fyri gassinum, teir siga tað verður gjørt fyri at revsa Týskland.

Tað er sannlíkt, tí síðani 21. juli er bara ein fimtapartur av gassinum, sum leiðingin klárar, komin til týsku brúkararnar.

Nú verðir bíðað í spenningi eftir, um gassleiðingin letur upp aftur 3. september, sum boð eru komin um.

Ivi er kortini um gassið, tí talsmaðurin hjá russisku stjórnini, Dmitrij Peskov, hevur sagt, at um einki óvanligt hendir, burtursæð frá tekniskum trupulleikum av tiltøkum, so letur leiðingin upp aftur sum ætlað.

Leiðarin fyri týsku veitingartrygdini, Klaus Müller, hevur sagt seg ikki skilja, hví neyðugt er at steingja gassleiðingina nú, og setir spurnartekin við endamálið hjá Gazprom.

Í Týsklandi er fólk í iva um russiska gassið, og nógv bera ótta fyri, at tey verða noydd at sita køld í vetur.

Gassleiðing, gass, gass úr Russlandi - Mynd: Ritzau Scanpix

Skrúva eisini fyri veitingini til Fraklands

Gazprom hevur eisini boðað frá, at øll gassveiting til Fraklands heldur uppat í morgin.

Gazprom boðar frá, at franska felagið, Engie, hevur ikki goldið fyri gassið, sum felagið fekk í juli.

Og so leingi, sum tað ikki er gjørt, verður einki gass sent til Fraklands, eru boðini frá Gazprom.

Franski forsætisráðharrin, Elisabeth Borne, biður franska vinnulívið um at fyrireika seg til, at tað kann gerast torført at fáa streym í vetur.

Vanliga fær Frakland 70 prosent av orkuni frá 56 kjarnorkureaktorum, men í løtuni eru 32 av teimum sløktir, tí teir skulu dagførast og gerast betri og tryggari, skrivar NTB.