ES-lond avmarka oljukeyp úr Russlandi munandi

bannari
ES-lond avmarka oljukeyp úr Russlandi munandi
Sætti pakkin av tiltøkum móti Russlandi kemur í gildi alt fyri eitt
Eisini forkvinnan í ES, Ursula von der Leyen, fegnast um semjuna, sum ES-londini hava gjørt.
Mynd: Ritzau Scanpix  
 
31.05.2022 - 09:26

ES-londini skulu gevast at keypa tveir triðingar av tí oljuni, sum tey nú keypa úr Russlandi. Tað samdust leiðararnir í ES um á fundi í gjárkvøldið.

Tað skrivar forsetin í ES, Charles Michel, á Twitter.

Og avgerðin fær gildi alt fyri eitt, leggur hann aftrat.

Tað fer at hava við sær, at Russland missir stórar inntøkur, sum landið brúkar í krígnum í Ukraina.

 

Størsti bankin eisini raktur

Leiðararnir í ES eru samstundis samdir um, at nokta størsta russiska bankanum, Sberbank, at nýta gjaldsskipanina, Swift.

Og tríggjar sjónvarpsstøðir, sum russar eiga, missa rættin at virka í Europa.

Talan er um sætta pakkan av tiltøkum, sum ES setir í verk ímóti Ruslandi.

Og samstundis sum ES samtykti tiltøkini, samdust londini eisini um at senda meiri hjálp til Ukraina. Í hesum umfarinum skulu níggju milliardir evrur latast Ukraina. Tað svarar til umleið 67 milliardir kr.

Eisini forkvinnan í ES, Ursula von der Leyen, fegnast um semjuna. Hetta fer at hava við sær, at londini í ES gevast at keypa 90 prosent av oljuni úr Russlandi, áðrenn árið er liðið, skrivar hon.

 

Ungarski leiðarin hevur verið ímóti ES-tiltøkum, men endin var, at Viktor Orban, í miðjuni, góðtók semjuna. (Mynd: Ritzau Scanpix)

 

Orban kundi góðtaka semjuna

Samtyktin var gjørd, hóast Ungarn hevur mótmælt leingi, tí landið hevur tørv á bæði olju og gassi úr Russlandi.

Ungarski forsætisráðharrin, Viktor Orban, sum samstarvar nógv við Vladimir Putin, forseta, kundi góðtaka semjuna, tí tiltøkini ikki fevna um olju, sum verður latin ígjøgnum rørleiðingar. Arbeitt verður við eini loysn á tí spurninginum, stendur í semjuni.

Ungarn keypir umleið 65 prosent av sínari oljunýtslu úr Russlandi, og tað kann landið fyribils halda fram við.

Slovakia og Kekkia hava eisini biðið um at fáa longri skotbrá, tí tey keypa eisini nógva olju úr Ruslandi.

Er kopiera
Nýggjastu sendingar í ÚV
Týsdag 18. februar
Morgunlestur týsdagur 18.februar 2025
186671
Mánadag 17. februar
Karl Vidtfeldt: Beri felagið í hjartanum
187908
Mánadag 17. februar
Norðurljóð 17.februar
187247
Mánadag 17. februar
Til lukku Eyðun & Atli
187881
Nýggjastu sendingar í SV
Sunnudag 16. februar
VÍF - Kyndil, menn
187840
Sunnudag 16. februar
Guðstænasta úr Havnar kirkju
187829
Leygardag 15. februar
2. hálvfinala hjá monnum: H71 - KÍF
187825
Leygardag 15. februar
H71 - Neistin, kvinnur
187824
Fríggjadag 14. februar
Dagur og vika - teknmálstulkað
187762