USA: Russar søkja at sivilum málum

Russiskar deildir fremja í alt størri mun álop á sivilmál í Ukraina. 

Tað sigur amerikanska stjórnin.

- Vit hava sæð alsamt fleiri álop á sivila undirstøðukervið, sum er sivilmál, sigur eitt embætisfólk í Pentagon við týsku tíðindastovuna, DPA.

15. mars hevði ST skrásett, at 726 sivilfólk vóru dripin, harav 52 børn, og 1.174 eru særd, síðani kríggið brast á 24. februar. Veruliga talið er helst munandi størri.

Ringur moralur

Samstundis er moralurin hjá russisku deildunum viknaður fleiri staðni, sigur embætisfólkið.

- Vit hava ikki innlit í hvørja einastu deild, og hvar tær eru. Men vit hava fingið greiðar ábendingar um, at moralurin er vánaligur í fleiri deildum, segði embætisfólkið.

Russiska verjan umhugsar nú at fáa hjálp.

Alsamt størri virksemi er hjá russiska flotanum við havnabýin Odessa í útsynningspartinum av Ukraina, men eingi greið tekin eru um álop frá sjónum, sigur keldan fyri DPA.

Álop á heilsustovnar

Í minsta lagi 12 fólk eru dripin og 34 hava fingið skaða í í minsta lagi 43 álopum á heilsustovnar í Ukraina.

Tað sigur aðalskrivarin í heimsheilsustovninum, WHO, Tedros Adhanom Ghebreyesus, sambært CNN.

Millum tey deyðu og løstaðu eru heilsustarvsfólk, sigur hann.

- Álop á heilsuverk er brot á altjóða humanitera lóg, sama nær tað er, og hvar tað er. Tey forða fólki at fáa neyðuga hjálp og oyðileggja heilsuverk, sum longu eru undir trýsti, sigur Tedros Adhanom Ghebreyesus.