Týðandi framstig gjørd í friðarsamráðingum

Ukraina og Russland hava gjørt týðandi framstig í sambandi við eina fyribils ætlan fyri friði, sum m.a. fevnir um vápnahvíld, og at Russland tekur seg aftur.

Tað skrivar Financial Times, sum hevur upplýsingar frá trimum ónevndum keldum, ið eru við í samráðingunum.

Í ætlanini eru 15 krøv. 

Sambært ætlanini skal Russland góðtaka vápnahvíld og taka herfólkið aftur, um so er, at:

- Ukraina sleppur ætlanunum um at gerast limur í Nato
- at Ukraina lovar, at onnur lond ikki mugu hava herstøðir í landinum, 
- og at Ukraina vissar um, at útlendsk herfólk og útlendsk hernaðarútgerð ikki sleppa inn í landið. 

Langt eftir á mál

Financial Times skrivar tó, at langt er eftir á mál, til semja fæst um eina avtalu.

- Kreml vil als einki siga um møguligu friðaravtaluna, sigur talsmaðurin hjá Putin, Dmitrij Peskov, í dag, sambært russisku tíðindastovuni, RIA, skrivar Reuters.

Í dag hevur fundur verið millum vejrumálaráðharar í Nato.

Eftir fundin segði aðalskrivarin í Nato, Jens Stoltenberg, at eingi tekin eru um, at Russland tekur seg aftur ella minkar um álopini í Ukraina, hóast friðarsamráðingarnar við Ukraina. 

- Tað, sum Ukraina kann fáa við samráðingarborðið, er neyvt knýtt at, hvat tey megna á hermótinum. Tí kunnu vit hjálpa Ukraina við at fáa gott samráðingarúrslit við at styrkja teirra møguleika at vinna á Russlandi á hermótinum, segði Stoltenberg eftir fundin í dag.