Eingin søkti hesaferð

Eingin vil vera býarverkfrøðingur í Havn.

Nú Tórshavnar kommuna fyri fjórðu ferð í ár søkti eftir býarverkfrøðingi, var eingin umsøkjari, tá freistin at søkja fór týsdagin.

Fyrr í ár hava verið tríggjar umsóknir.  

Heini Eysturoy var býarverkfrøðingur í Havn fram til ársskiftið 2018/2019.

Síðani tá hevur tekniski stjórin í kommununi, Marius Müller, røkt starvið sum býarverkfrøðingur.

Lýst leyst

Marius Müller sigur, at starvið verður lýst leyst aftur. Men tað verður ikki fyribils.

Nú verður umskiping gjørd í umsitingini fyri næsta árið ella næstu tvey árini.

Kommunan hevur ikki loyvi til at samráðast um lønir. - Hon noyðist at halda seg til lønirnar í sáttmálunum.

Tað noyðast privatir arbeiðsgevarar ikki, so teir kunnu geva hægri løn enn sáttmálarnir siga.

Nú trot er á fólki á arbeiðsmarknaðnum kunnu privatir arbeiðsgevarar bjóða hægri løn enn sáttmálarnir siga.