Álitiskreppa í Slovakia

Í minnistalu síni fyri teimum báðum, Ján Kuciak og Martina Kusnirova, sum varð send beinleiðis, kravdi forsetin, at stjórnin kannar málið til botns, ella verður stjórnin send til hús.

Seinasta greinin, sum Kuciak skrivaði, var um mutur í Slovakia og um møgulig sambond millum slovakiskar aktørar, ES-fíggjaðar verkætlanir í Slovakia og italsku mafiuna.

Funnist hevur verið hvassliga at slovakisku stjórnini eftir morðini, og fleiri persónar í leiðandi størvum eru send til hús.

Kiska, forseti, sigur, at álitis-kreppa er í landinum, og at hann fer at kjakast við politiskar leiðarar um, hvussu tey síggja framtíðina, og hvussu álitið á politisku skipanina kann endurreisast.

Mótstøðumaður Kiska, forsætisráðharrin Robert Fico, tekur ikki undir við at umskipa stjórnina. Sambært Fico er tað at undirgrava úrslitið frá seinasta vali í 2016.

Kiska hevur onga politiska heimild at koppa stjórnini, men hildið verður at orðini hjá honum fara at økja um trýstið frá fólkinum á stjórnina. 

Nýval kann verða, um 60 % av limunum í tjóðartinginum taka undir við tí.

Stjórnin kann eisini reisa álitisváttan, og tá skal vanligur meiriluti av teimum, sum eru í tjóðartinginum, stuðla stjórnini.

Eisini kunnu 30 tjóðartingslimir reisa misálit á stjórnina, og tá skal verða avgjørdur meiriluti fyri at stuðla stjórnini, skrivar Ap og Reuters.