Ein millión krónur til málmenningina hjá børnum

Mentamálaráðið hevur givið sjey umsóknum afturat pengar til at stimbra málmenningina hjá børnum.

Stuðulin er 600.000 kr. tilsamans.

14 umsóknir vóru um pengar til barna- og ungdómsarbeiði.

Lýst varð serliga eftir umsóknum um verkætlanir, sum kunnu stimbra málmenningina hjá børnum.

Handbók og Youtube

Verkætlanirnar fevna víða. Ein er ein handbók ætlað foreldrum, aðrar eru faldarar, sum lýsa týdningin, sum lesing hevur fyri málmenning barnanna, stuttir filmar á Youtube, og verkætlanir, sum venda sær til starvsfólk í dagstovnum ella børn í teimum yngstu flokkunum.

Eisini vóru onkrar umsóknir játtaðar, sum eru um alternativar samskiftishættir, til dømis hjá børnum við breki.

Í summar fingu fýra verkætlanir, sum skulu stimbra málmenningina hjá børnum, stuðul frá Mentamálaráðnum. Tær fingu 385.000 kr. tilsamans.

Pengarnir koma úr veddingarpuljuni. Hon er tríggjar milliónir krónur í ár.