Philip Lund aftur í B36

B36 hevur styrkt um álopspartin. Framherjin, Philip Lund, hevur undirskrivað sáttmála fyri komandi kappingarár.

Danin er kendur í B36, tí hann umboðaði eisini felagið afturi í 2015. Tá kom hann til B36 eftir summarsteðgin.

Philip Lund tykist at vera ein fótbóltsævintýrari, tí hann hevur roynt seg í fleiri fjarskotnum feløgum.

Í fjør spældi hann fyri felag í Malaisia, og áðrenn tað hevur hann eisini umboðað amerikonsk feløg.

Skaðar gjørdu, at Philip Lund bara spældi sjey dystir fyri B36 í 2015. Hann skoraði fýra mál í teimum dystunum.

B36 skrivar í kvøld eisini á heimasíðuni, at felagið hevur longt sáttmálan við miðvallaran, Eli F. Nielsen, fram til 2018.