Tryggingarviðurskiftini fingin í rættlag

Landsfelagið fyri bjargingarfeløg hevur fingið nýggja trygging, boðaði felagið frá í tíðindaskrivi hósdagin. Trygd og Landsfelagið undirskrivaðu í gjár avtalu, sum merkir, at sjálvboðin bjargingarfólk eru nóg væl tryggjað, tá tey virka í føroysku tilbúgvingini.

Tryggingaravtalan sigur, at sjálvboðin bjargingarfólk, sum eru skrásett í einum bjargingarfelagi og fáa skaða í átøkum á landi ella á sjógvi, ikki skulu missa inntøku, tí tey gerast óarbeiðsfør av skaðanum.

Treytin fyri endurgjaldi er, at arbeiðsskaðatryggingarlógin er galdandi fyri skadda bjargingarfólkið. Formaðurin í Landsfelagnum, Regin Jespersen, sigur, at tey hava fingið eina góða tryggingaravtalu.

SÍ EISINI Mist tolið: bjargingarbáturin Lív lagdur

Landsfelagið hevur arbeitt saman við Fiskimálaráðnum og ráðført seg við felagið Tiljar um tryggingaravtaluna. Tryggingaravtalan skal endurskoðast í heyst. Tá verður virksemið hjá bjargingarfeløgunum eisini formfest við góðskuskipan.

Eisini skal yvirskipaða samstarvið millum Landsfelagið og Fiskimálaráðið dagførast. Tann 7. november í fjør varð bjargingarbáturin Lív hjá Havnar bjargingarfelag lagdur.

Ein kvinna fekk skaða umborð, men eingin trygging tók við. 13.november steðgaðu feløgini, sum eru í Landsfelagnum fyri bjargingarfeløg, øllum virkseminum, tí tryggingarviðurskiftini hjá teimum sjálvbodnu, sum arbeiða fyri feløgini, vóru so ógreið.