Johan Dahl: Telesamskifti ov dýrt í Føroyum

<p>Landsstýrismaðurin í vinnumálum ávarar nú telefeløgini móti at seta prísirnar ov høgt. Tí annars verður Fjarskiftiseftirlitið biðið um at lækka prísirnar.</p>

<p>Telesamskifti kostar ov nógv í Føroyum, sigur Johan Dahl, landsstýrismaður í vinnumálum. Seinastu árini hevur verið arbeitt við at lækka prísirnar fyri samskiftistænastur. Men hetta gongur ov seint og meira eigur at vera gjørt fyri at lækka prísirnar.</p>

<p>Johan Dahl hevur svarað einum fyrispurningi frá Kristionnu W. Poulsen, løgtingskvinnu. Trupulleikin er antin í kervinum, har Føroya Tele hevur monopol, ella í tænastunum, sum eru duopol hjá Vodafone og Føroya Tele.</p>

<p><strong>Fjarskiftiseftirlitið væntar lægri prísir</strong></p>

<p>Fjarskiftiseftirlitið fekk fyrst í hesum árinum eitt amboð til at hava eftirlit við kervinum. Ítøkiliga úrslitið er, sigur Johan Dahl, at prísurin á nøkrum kervistænastum er nógv lækkaður eftir avtalu við Føroya Tele.</p>

<p>Fjarskiftiseftirlitið væntar, at prísurin á fleiri kervistænastum fer at lækka. Um kappingin um tænasturnar er virkin, eiga hesar príslækkingar at koma brúkarunum til góðar.</p>

<p>Og so kemur landsstýrismaðurin við einari ávaring til telefeløgini. Tí blíva tænasturnar ikki bíligari, er neyðugt við ítøkiligum inntrivum í tænastupartin.</p>

<p><strong>Nýggj fjarskiftislóg í umbúna</strong></p>

<p>Til hetta verður óivað neyðugt at víðka heimildirnar hjá Fjarskiftiseftirlitinum til beinleiðis at kunna áseta prísin á fjarskiftistænastum.</p>

<p>Um tað kemur til tað, so kann grundleggjandi spurnartekin setast við, um tað framhaldandi er rætt at hava frían marknað á fjarskiftisøkinum, sigur Johan Dahl, landsstýrismaður.</p>

<p>Hann sigur eisini, at landsstýrið ætlar at gera nýggja fjarskiftislóg. Tann lógin skal millum annað forða fyri, at telefeløgini misbrúka marknaðarstøðuna.</p>

<p>Í heyst verður ráðstevna í Føroyum um kapping og stýring í smátjóðum, har marknaðurin er avmarkaður. Ráðstevnan skal viðgera fjarskifti, flogferðslu og orku.</p>