Fakfelag: Vit hava sáttmála við lemmatrolarar

- Tað er okkara greiða fatan, at vit hava gjørt sáttmála við felagið hjá lemmatrolarunum, og tí verður trolarin Edna liggjandi, til eigarin heldur sáttmálan.

Tað sigur Eyðstein Djurhuus, formaður í Føroya Skipara- og Navigatørfelag.

Manningarfeløgini gjørdu í farnu viku av at leggja Ednu, tí eigararnir ikki hildu sáttmálan.

Eingin sáttmáli

Reiðarin, Súni Jacobsen, segði, at eingin sáttmáli var galdandi, og tí hevði hann lønt manningini við fastari hýru um dagin. Eyðstein Djurhuus sigur, at feløgini í vetur gjørdu nýggjan sáttmála fyri lemmatrolararnar, eftir at tann gamli fór úr gildi á nýggjárinum.

Nakrar broytingar vórðu gjørdar, áðrenn feløgini og tríggir reiðarar skrivaðu undir nýggja sáttmálan tann 13. februar.

Reiðararnir, sum skrivaðu undir, vóru: Marner Lisberg á Tvøroyri, Jákup Pauli Hammer úr Hvalba og Tummas Henriksen úr Sørvági. Teir umboða meginpartin av lemmatrolarunum.

Skrivaðu ikki undir

Eigararnir á tveimum trolarum skrivaðu ikki undir. Tað var Súni Jacobsen, sum eigur Ednu, og Hans Andrias Joensen, sum eigur Phoenix.

Phoenix eigur bert heilt fáar dagar undir Føroyum, sigur formaðurin í Skipara- og navigatørfelagnum. Hans Andrias Joensen er formaður í felagnum fyri lemmatrolarar, og hóast hann var við á onkrum samráðingarfundi, so skrivaði hann ikki undir.

Eyðstein Djurhuus sigur, at tá so stórur partur av teimum, sum eiga lemmatrolarar, skriva undir, so var tað greiða fatanin hjá feløgunum, at teir umboðaðu allar trolararnar. Og í tí spurninginum hava manningarfeløgini ikki broytt støðu, sigur hann.

Súni Jacobsen segði fríggjadagin, at hann í hesi vikuni fór til Hollands at samráðast við eitt felag, sum ætlar at leiga Ednu.