Eisini annað enn jodl

Nicole Zehnder úr Sveis greiðir eitt sindur frá um sveisiskan tónleik og velur nøkur sveisisk løg.

- Tá tosað verður um sveisiskan tónleik, fara tankarnir beint til alpuhorn, sveisiska harmoniku, fólkatónleik og at jodla, hóast ljóførini ikki vóru kend í Sveis fyrr enn eftir 1800, sigur Nicole.

Flestu okkara kenna allarhelst jodling úr onkrari sjónvarpslýsing ella líknandi, men hvat er tað í grundini?

- At jodla er at ógvuliga skjótt og aftur og aftur at skifta millum vanliga rødd og falsett, ímeðan tú sigur meiningsley ljóð sum “yo-lollo-dee-uuh”. Jodlisangir hava vanliga ørindi við teksti og síðani niðurløg við jodli. Tó er sveisikur tónleikur ikki bert jodl í dag. Vit hava allar hugsandi sjangrur frá fólkatónleiki til popp, rock og country. Summi syngja bara á sveisaratýskum og onnur á enskum.

Eitt sindur um sangirnar

Gotthard – Heaven
- Ein vakur sangur og ein klassikari í Sveis. Sangurin sungin av einum av okkara kendastu tónleikarabólkum, sum syngja á enskum. Sangurin snýr seg um kærleika, tá hann kennist sum at vera í himli. Forsangarin doyði í einum motorsúkkluóhappi í USA, men sveisarar lurta enn nógv eftir sangum hansara.

Gölä – Schwan:

- Hesin sangurin er eisini ein klassikari í Sveis. So gott sum øll í týskttalandi partinum av Sveis duga tekstin uttanat. Sangurin snýr seg um eina gentu, ið var happað í skúlanum og sædd sum ljóti dunnuungin – ella svarti svanin. Seinni verður hon tó til ein vakran, hvítan svan. Gölä, ið sær út sum ein rokkari, syngur altíð á sveisaratýskum, og eru sangirnir sum smáar, kenslubornar søgur.

Bligg – Rosalie:

- Rosalie er eisini á sveisara týskum og snýr seg um eina kvinnu, sum eitur Rosalie, og hvussu ein maður, ið møtir henni, vil gleða hana við at geva henni rósur og siga henni alt møguligt gott. Hon kennir seg serliga, tí tað er langt síðani, at nakar hevur verið so fittur við hana. Hetta er ein klassisk landaplága í Sveis. 

Polo Hofer – Alperose

Alperose, ið merkir rósa úr Alpunum, er ein av elstu (1985) og kendastu sveisaratýsku sangunum. Nógv fólk úr fjallalendi lurta enn eftir sanginum, ið eisini ofta verður spældur í skíðsmáttum um veturin, og øll syngja við, tí niðurlagið er væl kent og lætt at minnast. Teksturin snýr seg um vakra landslagið í Alpunum, har ein maður møtir eini kvinnu og kallar hana vøkru rósuna úr Alpunum.

Stress – Libéré:

- Hesin sangurin er frá einum av kendastu tónleikarunum í franska partinum av Sveis og er á fronskum. Sum navnið sigur, so snýr lagið seg um frælsi, og hvussu væl tað kennist at vera fræls/ur frá stressi, sorg og hatri, og hvussu gott tað er at vera saman við teimum, ein elskar.

Sveisisku sangirnir eru ikki á Spotify, men trýst á menuina ovast í vinstra horni á vindeyganum niðanfyri fyri at velja millum sangirnar.