569 fólk løgdust aftrat seinasta árið

1.apríl í ár búðu 569 fleiri fólk í Føroyum enn 1.apríl í fjør.

Vøksturin er 1,1 prosent.

1.apríl í ár búðu 54.362 fólk í Føroyum, skrivar Hagstovan.

Fólkatalið veksur framvegis, men seinastu mánaðarnar er fólkavøksturin minkaður nógv. 

Burðaravlop og nettoflyting

Vøksturin seinasta árið kemur av burðaravlopinum, sum var 187 fólk, og nettoflytingini, sum var 382 fólk. 

Burðaravlopið er vaksið eitt vet, tí færri doyðu.

Nettoflytingin minkaði, tí fleiri enn fyrr fluttu av landinum.

Fólkavøkstur var í 18 av 29 kommunum frá 1.apríl 2022 til 1.apríl 2023, sigur Hagstovan.