Kunnu ikki fáa uppihaldspening og fara í feriu uttanlands

Tað ber ikki til hjá fólki at fáa uppihaldsveiting frá tí almenna, samstundis sum tey fara í feriu uttanlands, og eru burtur í fimm vikur ella longur.

Tað hevur Føroya Kærustovnur staðfest. 

Tað var Almannaverkið, sum avgjørdi at steðga fyribils uppihaldsveiting hjá fólki, tí viðkomandi tá hevði verið uttanlands í feriu í samanlagt fimm vikur.

Skal vera í Føroyum

Almannaverkið vísti á, at ein av høvuðstreytunum fyri at fáa fyribils uppihaldsveiting er, at viðkomandi er í Føroyum.

Avgerðin var kærd, men Føroya Kærustovnur hevur nú staðfest avgerðina hjá Almannaverkinum.

Undantøk kunnu gerast, um:

• Fólk skal hava samveru við egin børn, og samveran ikki kann vera í Føroyum.
• Um fólk fer uttanlands í læknaørindum.
• Um fólk skal vitja avvarðandi uttanlands, sum eru álvarsliga sjúk, ella um farið verður sum fylgjari við fólki, ið skal uttanlands í sjúkraørindum.