KÍ skal helst niður til krígsherjaða økið at spæla

Hóast KÍ fall við æru í strembanini at koma í Champions League-endaspælið, so hevur KÍ hóast alt vunnið sær rættin at spæla ein endadyst - Play Off-dyst - um at koma í Europa League-endaspælið. 

Tann dysturin verður eftir øllum at døma móti FC Sheriff Tiraspol. 

FC Sheriff Tiraspol

FC Sheriff Tiraspol er heimahoyrandi í Tiraspol, ið er høvuðsstaður í sonevnda útbrótaralýðveldinum Transnistria, sum liggur millum Ukraina og Moldova.

Tiraspol

Hetta er ein pro-russiskur landspartur í Moldova, sum í 1990 lýsti seg sum sjálvstøðugt lýðveldi, men enn hevur einki ST-limaland viðurkent Transnistria sum sjálvstøðuga tjóð.

Tiraspol liggur beint við markið til Ukraina, og frá Tiraspol til Odessa, sum javnan verður álopin av Russlandi, eru bara góðir 100 kilometrar.

Odessa

Mæla frá ferðing til Transnistria

Bæði norskir og svenskir myndugleikar mæla frá allari óneyðugari ferðing til Transnistria.

Eftir russisku innrásina í Ukraina í fjør fekk Sheriff Tiraspol bann fyri at spæla sínar altjóða heimadystir í Tiraspol.

Í staðin mátti liðið spæla sínar heimadystir í moldovska høvuðsstaðnum Kisinau.

Tað bannið er ikki galdandi í ár.

Tummas Lervig

KÍ-formaðurin vil hava vissu fyri trygd

Eftir ætlan møtast KÍ og Sheriff Tiraspol í Føroyum hósdagin 24. august, og returdysturin verður í Tiraspol 31. august. Ella verður hann tað?

Eitt er spurningurin, um dysturin í Moldova verður fluttur, men tað er eisini komið fram, at moldovska liðið kann fáa trupulleikar við at fáa innferðarloyvi við so stuttum skotbrái.

Tí hevur møguleikin fyri at býta um eisini verið nevndur, so KÍ spælir fyrra dystin á útivølli.

KÍ, Molden, Champions League

Tummas Lervig er formaður í KÍ vil hava trygd fyri, at KÍ-leikararnir og -starvsfólkini eru trygg. 

Sigast skal, at tað er ikki heilt vist enn, at Sheriff Tiraspol verður næsta mótstøðuliðið hjá KÍ.

Sheriff skal fyrst spæla móti hvítarussiska liðnum BATE Borisov um at koma víðari í kappingini. Men Sheriff vann fyrra dystin teirra millum 5-1, so BATE Borisov skal vinna við í minsta lagi fýra málum, tá liðini møtast aftur í annaðkvøld.