Vindrøkt forðar fyri útboði

Tað er bara eitt øki, sum er klárt til framleiðslu av vindorku í norðurøkinum í løtuni, og tað er Hoyvíkshagin. 

Vindrøkt hevur gjørt avtalu við bóndan um økið, men felagið sleppur ikki í gongd við framleiðslu. Orsøkin er elveitingarlógin.

Sambært Kára Mortensen, deildarleiðara á Orku á unhvørvistænastuni, so má økið bjóðast út í fríari kapping, um tað skal brúkast til framleiðslu. Hetta ynskir Vindrøkt tó ikki, tí felagið metir seg hava rætt til framleiðslu á økinum.

Stjórin á Vindrøkt, Jóhan í Niðristovu, segði við Dag og Viuku í gjár, at teir eru til reiðar við trimum økum til vindmyllulundir. Men sambært deildarleiðaranum á Orku á Umhvørvisstovuni, so eru bara gjørdar nøktandi vindmátingar á tí eina økinum, sum er Hoyvíkshagin. Hini kunnu bara brúkast til smærri vindmyllur. 

Sambært Kára Mortensen, so eru Vindrøkt sjálvir forðingin fyri, at Hoyvíkshagin ikki verður boðin út. 

- Tað eru ymisk áhugamál á økinum. Um tað var soleiðis, at teir komu við umsókn til umhvørvisstovuna um at seta myllir upp, so høvdu vit kunnað gjørt eitt útboð. So hevði tann, sum bjóðaði hægst. fingið møguleikan at sett myllir upp, sigur Kári Mortensen. 

Sambært Kára Mortensen, so er eitt skipað arbeiði í gongd við at gera fleiri øki klár, og longu í summar verður økið á Eiði bjóðað út. Framleiðslan har kann byrja seinna hálvár í 2020. 

Hoyr samrøðuna við Kára Mortensen omanfyri.