Eftirlýsir avgerð í flokkinum um borgarstjórar

Norðoya Javnaðarfelag bað í fjør landsstevnuna hjá Javnaðarflokkinum avgera, um politikarar hjá flokkinum kunnu vera bæði borgarstjórar og løgtingsfólk í senn.

Kortini atkvøddu býráðslimirnir hjá Javnaðarflokkinum í Klaksvík í gjár fyri, at borgarstjórin, Jógvan Skorheim, kann vera borgarstjóri og løgtingsmaður.

Leiðslan í Javnaðarflokkinum skuldi eftir landsstevnuna í fjør arbeiða víðari við uppskotinum úr Norðoyggjum um dupultmandat.

Signhild V. Johannesen, sum er varaborgarstjóri í Klaksvík, hevur ikki frætt, hvussu er vorðið við uppskotinum. Men hon vónar, at málið verður avgreitt á landsstevnuni í vár.

Í farna kommunuvalskeiði vóru tveir javnaðarmenn borgarstjórar og løgtingsmenn, Heðin Mortensen og Kristin Michelsen.  

Fyrst í apríl í fjør segði Aksel V. Johannesen, formaður í Javnaðarflokkinum, at hann er ímóti, at fólk í flokkinum kunnu røkja tvey politisk størv í senn.

Hoyr samrøðu við Signhild V. Johannesen í útvarpstíðindunum.