Fólkaskúlin: Fyrstuhjálp á tímatalvuni

Tey hava lært nakað, sum eg vóni, at tey ongantíð fáa brúk fyri. Tað sigur Jákup av Skarði, samskipari hjá Reyða Krossi Føroya, í sambandi við at fleiri enn túsund fólkaskúlanæmingar í hesum døgum skulu læra fyrstuhjálp. 

Mikudagin var fyrstuhjálp á tímatalvuni í Fuglafjarðar skúla, har næmingarnir í 8.b høvdu ein øðrvísi skúladag. 

"Eg haldi, at tað er gott at læra fyrstuhjálp. Tí um onkur dettur, so klári eg at hjálpa", sigur Jónas Aronsson Olsen, sum gongur í 8.b. 

1.035 ungdómar runt allar Føroyar skulu eftir ætlan læra at geva fyrstuhjálp, sigur Reyði Krossur Føroya, sum skipar fyri átakinum.