Neyðugt at eftirmeta 20 ára gamla fosturforeldraskipan

Fosturforeldrafelagið heldur, at neyðugt er at eftirmeta fosturforeldraskipanina, sum skjótt er 20 ára gomul.

Á aðalfundi felagsins leygardagin var áheitan send Djóna Nolsøe Joensen, landstýrismanni, um at fáa sett gongd á eftirmetingina, ongantíð ov skjótt.

Fosturforeldrafelagið vil fegið vera við í arbeiðinum at eftirmeta skipanina, alla, sum hon er.

Nýggjastu tølini, tey eru frá 2023, siga, at 109 børn eru sett heiman.

Tað er, at tey av ymiskum orsøkum ikki kunnu búgva hjá sínum foreldrum.

Meginparturin hjá fosturfamiljum

70 prosent teirra eru burturav hjá fosturfamiljum. 30 prosent eru á barnaverndarstovni. 

Harumframt eru 43 børn, sum eru til umlætting hjá fosturforeldrum fastar dagar hvønn mánað.

Fosturforeldrafelagið hevur fingið nýggja heimasíðu og nýtt búmerki.

Á aðalfundinum leygardagin vóru Annlis Bjarkhamar, Herdis Justesen, Birna T. Gunnarsson, Randfríð Skorheim Sørensen og Marjun Sørensen valdar í nevndina.