Nú er lógligt at roykja og dyrka cannabis í Týsklandi

Frá í dag at rokna er lógligt hjá fólki í Týsklandi at dyrka og roykja cannabis eins væl og at hava tað uppiá sær.

Hetta samtykti týska tjóðartingið í februar, og í dag er nýggja lógin so komin í gildi.

Nýggja lógin sigur millum annað, at tað er loyvt at hava 50 gramm av cannabis umframt tríggjar cannabisplantur heima við hús, og í almenna rúminum er loyvt at hava upp til 25 gramm av cannabis uppiá sær.

Tað er tó framvegis ólógligt at keypa og selja cannabis, og tað er eisini ólógligt at brúka cannabis, har tað sæst frá skúlum og ítróttahallum.

Endamálið við lógarbroytingini er sambært DR at tálma keyp og sølu av rúsevnum á svarta marknaðinum.

Tað var ein ávís mótstøða móti lógarbroytingini, tá hon var til viðgerðar í februar.

Millum annað varð ført fram, at við hesi lógini verður staturin sjálvur eitt slag av narkohandlara. Týska løgreglan hevur víst á, at tað kann blíva trupult at handhevja lógina, og týska læknafelagið eins væl og barnalæknafelagið siga seg stúra fyri, at nýggja lógin kann føra til økta nýtslu, ikki minst hjá børnum og ungum.

Onnur hava víst á, at kanningar úr londum, sum partvíst hava legaliserað cannabis, ikki hava víst nakra økta nýtslu.