Semingsuppskot lagt fyri partarnar á middegi

Partarnir samráddust seinnapartin í gjár, og tá samráðingarfólkini hjá Maskinmeistarafelagnum og Lønardeildini fóru til hús, fóru semingsmenninir, Terje Sigurdsson og Símun Absalonsen, undir at orða eitt semingsuppskot, sum verður lagt fyri partarnar á middegi í dag.

Samráðingarnar millum Fíggjarmálaráðið og Maskinmeistarafelagið byrjaðu 12. mars, tá krøvini vórðu handað.

Talan er um at gera nýggjar sáttmálar fyri alment settar maskinmeistarar á landi, við Strandfaraskipum landsins, á vaktarskipunum og Magnusi Heinason.

Hesir sáttmálar fóru úr gildi 1. oktober í fjør.

Samráðingarnar bóru ikki á mál, so Semingsstovnurin varð boðsendur.

Hann hevur roynt at fáa partarnar at semjast, men tað bar ikki til, og nú verður eitt semingsuppskot gjørt.