Kostnaðurin mettur til 150 milliónir

Talgildu Føroyar fara at kosta 150 milliónur krónur. Kristina Háfoss, landsstýriskvinna í fíggjarmálum, hevur lagt uppskot fyri Løgtingið, sum skal geva henni heild at halda útreiðslurnar at fremja verkætlanina.

Talgildu Føroyar eru tilsamans fýra verkætlanir - tað eru Talgildi samleikin, Borgaraportalurin, Heldin og Grunddátur. Í uppskotinum sæst, at útreiðslurnar til verkætlanina kunnu í mesta lagi vera 145 milliónir krónur.

Útreiðslurnar hjá landsstýrismanninum kunnu í mesta lagi vera 85 milliónir krónur. Samstundis verður heimilað landsstýrismanninum at gera avtalur við privatar og almennar fyritøkur, grunnar og kommunur at fíggja ein part av verkætlanini.

Landsstýriskvinnan: Størsta talgilda frambrot

Talgildu Føroyar skulu millum annað geva føroyingum eitt talgilt persónligt samleikaprógv, sum eitt nú kann nýtast til at undirskriva løgfrøðiliga bindandi avtalur.

Tað skal eisini geva føroyingum eitt persónligt login, sum skal brúkast til at innrita seg í allar skipanir hjá tí almenna geiranum, til dømis SEV, Netbankan, TAKS og so framvegis.

- Talgildu Føroyar er størsta frambrotið nakrantíð innan talgilding í Føroyum, sigur Kristina Háfoss, landsstýriskvinna, ið sigur átakið gera dagligdagin lættari hjá fólki og vinnu.