Átikið sær ábyrgdina fyri álopið á Charlie Hebdo

Franska tíðindastovan, AFP, boðaði fyri løtu síðan frá, at leiðarin fyri yvirgangsfelagsskapinum al-Qaeda í Jemen hevur átikið sær ábyrgd fyri álopið á franska satirublaðið fyri viku síðan.

- Vit eru felagsskapurin Qa'idatul Jihad á arabisku hálvoynni, og vit átaka okkum ábyrgda av hesi atsókn sum hevnd fyri stríðmenn hjá Allah, sigur leiðarin hjá felagsskapinum í Jemen, sambært tíðindastovuni í eini sjónbandaupptøku.

Hann sigur eisini, at boðini um at leypa á blaðið komu frá al-Zawahiri, sum er ovast leiðari fyri al-Qaeda. Satiru-blaðið Charlie Hebdo kemur út aftur í dag - bert eina viku eftir, at fleiri leiðandi starvsfólk á Charlie Hebdo vórðu dripin í køldum blóði av yvigangsmonnum, meðan tey sótu á redaktiónsfundi.