Heilsurøktarar: Bara 15 prosent arbeiða fulla tíð

Bara 15 prosent av teimum 325 limunum í Heilsurøktarafelagnum arbeiða fulla tíð. 65 prosent arbeiða 0,70 ella 0,75, og restin arbeiðir minni. Í mongum førum er orsøkin til niðursettu tíðina, at arbeiðið er ov strævið likamliga og sálarliga.

Tað vísir ein trivnaðarkanning, sum varð løgd fram á palborðsfundi í Heilsurøktarafelagnum mánakvøldið.

Høgur meðalaldur

Trivnaðarkanningin vísir, at meðalaldurin hjá heilsurøktarum er høgur, 52,7 ár. 200 av teimum 325 limunum eru 51 ár ella eldri. Hóast fleiri heilsurøktarar kundu hugsað sær at arbeitt fulla tíð, t.e.. átta tímar, sleppa teir ikki,  og noyðast at arbeiða sjey tímar ella færri. 

Grundlønin hjá einum heilsurøktara, sum arbeiðir fulla tíð, er 24,619 kr. Tann, sum arbeiðir 0,75, fær 6.155 kr. minni, ella 18.464 kr.  Vaktirnar kunnu mangan eisini vera bara fimm tímar, sum eru spjaddir á nógvar ymsar dagar, og við mongum stuttum arbeiðsdøgum hava starvsfólkini ikki møguleika til at arbeiða eyka aðrastaðni.

Trivnaðurin versnaður

Á fleiri ellis- og røktarheimum eru reingeringin, køksstarvsfólkini og ítrivstilboðini skerd, og heilsurøktarar, sum eru útbúnir at veita heilsu- og sjúkrarøkt, hava merkt, at trivnaðurin hjá bæði teimum sjálvum og búfólkunum er versnaður, vísir kanningin.