- Tíðindi, mentan og ítróttur
Føroyskir framleiðarar útflyta meir fyri minni
<div>Føroyski útflutningurin er vaksin nógv seinastu mánaðirnar. Nýggjastu uppgerðirnar frá Hagstovuni vísa, at fýra teir fyrstu mánaðirnar vaks útflutningurin í tonsum við 43 prosentum í mun til sama tíðarskeið í fjør.</div><div><br></div><div>Men hóast stóra vøksturin í nøgd, var vøksturin í virði bara 12 prosent - tað vil siga tað sama sum, at vit fáa minni fyri fiskin í ár. Munurin á nøgd og virði sæst best í alingini. Frá januar til og við apríl í ár útfluttu vit 50 prosent meira alifisk enn somu mánaðirnar í fjør. Men virðið av alifiskinum hækkaði bara tvey prosent.</div><div><br></div><div>Hagstovan skrivar, at prísstøðið á alilaksi hevur í nøkur ár verið óvanliga høgt, tí útboðið av laksi minkaði nógv, tá alivinnan í Kili varð rakt av sjúku. Nú er prísurin so lækkaður aftur, og tað sæst aftur í, at virðið í útflutninginum av laksi ikki øktist eins nógv og útfluttu nøgdirnar.</div><div><br></div><div>Meðalprísurin pr. kilo av alifiski í ár var 29 krónur og 60 oyru, meðan hann sama tíðarskeið í fjør var 41 krónur og 30 oyru. Í nøgd hevur størsti vøksturin í ár verið uppsjóvarfiskur. Tað er útflutningurin av svartkjafti, sum serliga er vaksin fyrsta triðingin av í ár í mun til í fjør.</div><div><br></div><div>Eisini er útflutt meira av botnfiski, og her er tað serliga upsijn, sum stendur fyri vøkstrinum, meðan tað er útflutt minni av toski, skrivar Hagstovan. Fyrstu fýra mánaðirnar í ár útfluttu vit 99.554 tons av fiskavørum fyri 1 milliard og 439 milliónir krónur.</div>
