Lasse Qvist er blivin Víkingur

<p>Eftir at Finnur Justinussen, sum bleiv toppskjútti í føroysku landskappingini í fjør, takkaði fyri seg og fór til Svøríki at spæla, &nbsp;hevur Víkingur leitað eftir nýggjum áleypara. Nú er hann funnin. Lasse Qvist hevur skrivað undir eitt ára sáttmála við Víking.</p><p>Lasse Qvist spældi fríggjakvøldið venjingardyst, sum Víkingur vann 5-0 á ÍF. Lasse Qvist skeyt tvey mál og legði upp til tvey onnur. Hetta hevur eftir øllum at døma sannført leiðsluna í Víkingi um, at hann er tann rætti leikarin til álopsplássið í felagnum.</p><p>Talan er helst um ein leikara, sum kann blíva ein av profilunum í føroysku kappingini. Lasse Qvist var, sum ungdómsspælari, knýttur at hollendska stórfelagnum, PSV Eindhoven, frá 2004 - 2005.</p><p>Í 2006 skrivaði hann sáttmála við FC Keypmannahavn. Hann spældi átta dystir fyri FCK og skeyt tvey mál.&nbsp;</p><p>Síðan 2009 hevur hann spælt fyri FC Nordvest, sum er í triðbestu donsku deildini. Har hevur hann spælt fimtan dystir og skotið tólv mál.</p><p>Lasse Qvist hevur spælt 42 ungdómslandsdystir fyri Danmark. Fimm fyri U16 landsliðið, tjúgu fyri U17 landsliðið, tveir fyri 18 landsliðið, sekstan fyri U19 landsliðið og ein fyri U21 landsliðið.</p><p>Heimasíðan hjá Víkingi skrivar, at Lasse Qvist er ein skjótur og sterkur áleypari, sum er væl fyri tekniskt.&nbsp;</p><p>Fyrsti dystur hjá Víkingi í landskappingini verður 25 mars. Tá spæla teir á útivølli móti TB.</p><p><br></p><p><br></p>