Myndarøð: TalGILDIÐ

Elektro hevur sínar upp og niðurtúrar í Føroyum, men sær út til at koma sterkt aftur í nýggja árinum. Vit hava havt noise konsertir og annað løgið, men hetta kvøldið var eitt innlit í elektriska pallin, sum breiðir seg frá avbjóðandi ljóðlist til visuellar framførslur.

 

Flestu bólkarnir høvdu filmar spælandi í bakgrundini. Har vóru allar møguligar pallmyndir frá ymsum filmum frá 80'unum, og vóru teir allir, uttan ein, gjørdir av Jan Nystrøm, sum eisini framførdi.

 

House, soul og genderfuck

Helgi byrjaði kvøldið við disking og filmsframførslum, sum hann sjálvur hevur gjørt. Hann er stutt síðani fluttur heim til Føroya eftir at hava lisið kommersiellan tónleik og síðani ljóðlist í Englandi.

Hann vil ikki avmarka síni verk til tónleik, men strekkja tey seg ofta til ljóðlist. 

 

Hann setti ballið í gongd, og stemningurin var í topp.

 

 

Helgi við Helga í bakgrundini. Filmurin liggur á Youtube til lagið #HLMB / He Loves My Body.

 

 

Nintendotónar og 80'ara science fiction

Jan Nystrøm er als ikki nýggjur til visuellu ljóðlistaframførslurnar, og sást hansara stílur og ikki minst filmsíblástur týðiliga aftur gjøgnum kvøldið.

 

 

Melodiskt við Frostfelt

Maðurin handan melodiska elektrobólkin er Líggjas Olsen, og verður tónleikurin framleiddur av SAKARIS.

 

 

HÚS

Rólant Lenvig av Reyni gav okkum seinar, minimalistiskar tónar. Hansara tónleikur er spennandi og nýggjur í føroyskum høpi.

 

 

Traditionell konsert við diskoskóm

Hulda fekk endiliga fólkið upp at dansa, og TalGILDIÐ gjørdist eitt ball í tí nú fulla hølinum.

 

Hóast hon noyddist at biða tey tríggjar ferðir, so skal bara eitt lítið skump til okkara kæru, smædnu føroyingar, sum sum vant stóðu aftast og inn ímóti vegginum til trý tey fyrstu nøvnini.

 

 

Ball fyri rest

Brynjolfur var síðsta navnið og dessertin til hetta fantastiska, væleydnaða kvøldið.

Hann diskaði út á náttina, til Perlan ikki kundi húsa longur, og fólkið fór víðari í býin.

 

Um hesir tónleikararnir og ljóðlistafólkini verða aftur at hoyra á barrum og dansistøðum kring landið, so verða Føroyar alt annað enn keðiligar.