Danir óttast yvirgang

Eftir álopini í París 13. november hevur Danmark hækkað terror-støðið, og politistar við stórum, løddum byrsum hava verið sæddir í serliga útsettum økjum í Keypmannahavn. Danir byrja sostatt veruliga at merkja, at har er ein vandi fyri yvirgangi.

Vænta eina yvirgangsatsókn

BT skriver, at sambært eini nýggjari kanning, sum Gallup hevur gjørt fyri Berlingske, so vænta heili átta út av tíggju danum, at Danmark verður útsett fyri yvirgangi innanfyri tey næstu árini. 

Sambært terror-granskaranum, Carsten Bagge Lausten, so er tað ikki løgið, at fleiri og fleiri danir meta, at har er ein veruligur vandi fyri, at tað fer at henda eitt yvirgangsálop í Danmark.

- Vit hava havt Muhammed-tekningarnar, vit eru í kríggj í Sýria, og vit hava verið í kríggj í Afghanistan. Vit eru avgjørt eitt mál hjá yvirgangsmonnum, sigur hann.

Vilja ikki broyta atferð

Men hóast tey flestu meta, at vandin fyri yvirgangi er veruligur, so fara danir enn á café, gera ørindir og taka tokið, júst sum tey plaga. Gallup kanningin vísir nevniliga, at heili 87 prosent av danum meta ikki, at teirra atferð er broytt.

Sambært Henrik Lyng, ið er kreppusálarfrøðingur, merkir hetta, at yvirgangsmenninir í París enn ikki hava klárað at sáa tann óttan í Evropa, sum teir ynskja.

- Endamálið hjá yvirgangsmonnunum er at skapa ótta og at gera okkum ótrygg í egnum umstøðum. Teir vilja, at vit skulu broyta atferð, og at vit skulu hava misálit til okkara felags borgarar og til okkara myndugleikar. Í Danmark er hetta ikki eydnast enn, sigur Henrik Lyng.