Tíðindaskriv: Hví velja Føroyar?

Hví velja Føroyar? Soleiðis ljóðar spurningurin, sum verður viðgjørdur á fólkafundinum í Føroyahúsinum Keypmannahavn fríggjakvøldið 15. mai.

Í sambandi við at Frigg festivalurin verður 16. mai, hava MFS Keypmannahavnarnevndin og Frigg festivalurin sligið seg saman um fólkafund við tí í huga at varpa ljós á føroyskar útisetar, og hvussu hesir verða umrøddir á politiska pallinum í Føroyum.

Hóast allir flokkar eru samdir um týdningin av at fáa føroyskar útisetar heim aftur til Føroya eftir loknan lesnað, kenna føroyskir útisetar seg alt ov ofta gloymdar.

Viðurskiftini hjá útisetunum eru ikki at síggja, tá valstríð verða førd, hóast útisetar undir lesnaði hava valrætt. Hesum vilja MFS of Frigg Festivalurin basa, so føroyskir útisetar fáa eina rødd og verða hoyrd í politiska kjakinum.

Fundurin byrjar kl. 19.30 í Føroyahúsinum við móttøku og framløgum, og at enda fara umboð úr politisku flokkunum í Føroyum at kjakast um støðuna hjá føroyingum í útisetu.