2013 eitt søguligt ár fyri føroyskan tónleik

Føroyskur tónleikur hevur ongantíð havt tað betri. Í hvørtfall sambært nýggjastu frágreiðingini hjá FAME (Faroese Alliance for Music Export), sum staðfestir, at 2013 er eitt søguligt ár fyri føroyskan tónleik í altjóða høpi.

FAME er eitt samstarv millum Tutl International, G! festivalin og Løgmansskrivstovuna, sum hevur til endamáls at marknaðarføra og útflyta føroyskan tónleik í Evropa. Eitt úrslit av samstarvinum, sum byrjaði í 2012, er, at G! festivalurin fekk stóra umrøðu í viðurkendum evropeiskum miðlum. Mett verður, at seks milliónir fólk í Týsklandi, Sveis, Italia, Onglandi og Danmark hoyrdu ella lósu um ársins G! festival.

Samstarvið hjá Tutl við umboðsfólk úr evropeiska tónleikaídnaðinum, sum vitjaðu G! festivalin í 2012 og/ella í 2013, hevur við sær, at tá 2013 er liðugt, hava átta føroyskir bólkar og einstaklingar spælt meira enn 100 konsertir í Evropa í ár.

Í frágreiðingini stendur eisini at lesa, at spennandi verður at síggja úrslitini um fimm ár, um FAME-verkætlanin sleppur at halda fram. Steðgar arbeiðið at marknaðarføra føroyskan tónleik her, verður tónleikurin tó allarhelst skjótt gloymdur aftur.