Bloodgroup: Føroyskt/íslendskur elektropoppur ger um seg úti í heimi

Føroyskt/íslendski bólkurin Bloodgroup, ið m.a. er mannaður av Janusi Rasmussen, hevur seinastu árini markerað seg væl á íslendska tónleikapallinum og úti í heimi. Lívliga elektropopp-kvartettin hevur verið á heimsumfatandi konsertferðum og skrivað sáttmála við plátufelagið Sugarcane Recordings, ið m.a. gevur út fyri David Lynch, Hot Chip og Hercules and Love Affair.

Í mars kom triðja útgávan hjá Bloodgroup á marknaðin, ið ber heitið Tracing Echos, og fekk sera góða móttøku frá miðlunum. Okkara egni ummælari Knút Háberg Eysturstein gav fløguni fimm útav seks R og skrivaði m.a., at hon er ein frægd at lurta eftir. Tracing Echos er fyrsta fløgan hjá Bloodgroup síðan í 2009, tá Dry Land kom út, og nógv er hent í millumtíðini.

- Vit hava spælt um allan heimin ímillum hesar báðar fløgurnar, so bólkurin hevur ment seg sera nógv, og vit fingu eina sterka kenslu av, hvar vit vildu við útgávuni tónlistarliga, greiðir Janus frá. Tracing Echos er alternativur elektroniskur poppur við nógvum live-elementum, sum av og á eisini gerst myrkur og tungur.

- Tracing Echos er fyrsta fløgan, har vit hava innspælt alt í sama studio. Tað gav okkum møguleikan at arbeiða nógv skjótari og at gera fløguna lidna uppá relativt stutta tíð. Hetta gevur henni ein serligan kant og dokumenterar væl, júst hvar vit vóru, tá vit gjørdu hesa fløguna, sigur Janus. Fyri stuttum vóru tey fýra í Bloodgroup á konsertferð í Evropa við nýggju fløguni og eftir ætlan gongur leiðin til USA seinni í ár. Eisini kemur ein EP út við remiksum.

- Framtíðin hjá Bloodgroup er sera spennandi. Konsertferðir, fleiri útgávur, sjónbond og mangt annað er á veg, sigur Janus Rasmussen at enda.

Síðst í juni kom eitt sjónband til staklagið “Nothing is Written in the Stars” av nýggju fløguni út. Heiðrik á Heygum hevur gjørt sjónbandið, ið er eitt svart/hvítt tríkantsdrama í besta Hitchcock-stíli. Síggj tað her.