Kampus til Fróðskaparsetrið eitt stig nærri

Kampus, skúlaøkið hjá Fróðskaparsetrinum á Frælsinum í Havn, er nú komið eitt stig longri.

Landsverk biður um tilboð upp á undangóðkenning at vera við í tilgongdini at gera uppskot um felagsbygning til kampus. 

Undangóðkenningin gevur atgongd til at vera í arkitektakapping um felagsbygning til kampus á Frælsinum/Nóatúni í Havn.

Freistin er 16. januar

Freistin at søkja um undangóðkenning er 16.januar 2023.

24.januar verður kunngjørt, hvør sleppur við í undangóðkenningina.

Upp til fimm umsøkjarar kunnu væntast at vera undangóðkendir til arkitektakappingina.

Arkitektakappingin byrjar 13.februar og varar til 13.mai. 15.juni verður vinnarin kunngjørdur. 

Boðin út í Føroyum

Kappingin verður boðin út í Føroyum. Byggiharrin væntar at brúka tvær milliónir krónur til samsýningar.

Sambært heildarætlan, sum var gjørd í 2018, er felagsbygningurin eitt dukandi hjarta, sum savnar lesandi, starvsfólk og fólk annars.

Hetta skal vera ein bygningur á høgum byggilistarligum stigi, sum skal lagast til umhvørvið og vera við til at menna býin. 

Bygningurin skal vera við í einum skapandi umhvørvi, sum ríkar og gevur ávøkstur og menning í og uttan um bygningin, var sagt í 2018.