Sangarin í System of a Down fortelur føroyskum børnum um fólkadráp

Á Holocaustdegnum, sum er hósdagin 27. januar, fer Nám at varpa ljós á landið Armenia, og tað fólkadráp, sum Ottomanska Ríkið setti í verk har í landinum í 1915.

Hetta er fyrsta fólkadráp í 20. øld. 

Tvøroyrar skúli er lokalur vertur fyri tiltakinum, sum fer at bjóða øllum skúlum og áhugaðum vælkomnum, eins og gjørt varð í fjør úr Skúlanum við Streymin, tá evnið var Bosnia. 

Pallur fyri tiltakinum í ár er mentanarhúsið SALT, haðani stroymt verður.

Heimskendur sangarin greiðir frá

Støðið verður millum annað tikið í frásøgn frá armenska Serj Tankian, ið er sangari í heavy rock bólkinum System of a Down.

Ólavur í Geil, sum samskipar tiltakið, tosar við armenska sangaran.

Serj Tankian hevur lovað armenska abbanum, aldri at gloyma tað fólkadráp, sum núverandi Turkaland setti í verk móti armenska fólkinum.

Báðar ommurnar og báðir abbarnir hjá Serj vóru yvirlivarar. 

Um nakar ivast, hvør System of a Down er, so er eitt video við kenasta sanginum hjá bólkinum. Yvir ein millard spælingar á Youtube. 

Temasíða og stroyming

Nám hevur gjørt eina opna temasíðu við tilfari um Holocaustdagin. 

Øll kunnu fygja við, tá Holocaustdagurin verður hildin fyri skúlanæmingum í Salti hósdagin kl 10:00-11:30.