Flogskiparar vænta sær uppsøgn

Flogskipararnir, sum eru í starvi hjá Atlantic Airways, kunnuvænta sær eina uppsøgn, í næstum. Tað sigur Flogskiparafelag Føroya, sum hevur havt eykaaðalfund.

Nýggja nevndin í felagnum hjá flogskiparunum væntar, at nógvir av limunum í felagnum eru sagdir úr starvi áðrenn hesin mánin er liðugur.

Fara í "konstruktivt samskifti"

Felagið hevði eyka aðalfund fríggjakvøldið, og felagið fer komandi dagarnar í eitt "konstruktivt samskifti" - sum felagið skrivar - við Atlantic Airways í eini roynd, at varðveita so nógv størv, sum gjørligt.

Flogskiparafelag Føroya fer samstundis eisini at royna at tryggja, at galdandi ásetingarnar í sáttmálanum millum Arbeiðsgevarafelagið og Flogskiparafelagið verða hildnar í uppsagnartilgongdini.

Í nýggju nevndini hjá Flogskiparafelagnum sita Rúni Højgaard, formaður, Hans Christian Petersen, Johan í Niðristovu og Thomas Bo Petersen.