Spotify klárar ikki at vinna pening

Tónleikatænastan, Spotify, veksur alsamt, men vinnur framvegis ongan pening. Tað er niðurstøðan, nú ársroknskapurin hjá holdingfelagnum Spotify Technologies er kunngjørdur.

Hallið var 1,28 milliardir krónur í fjør, hóast inntøkurnar vóru fleiri enn 14,5 milliardir krónur. Ein vøkstur, ið er 80% í mun til árið fyri, tá vøksturin var 45 prosent.

Tænastan, sum loyvir fólki at stroyma óavmarkað mongd av tónleiki á netinum fyri eitt ávíst mánaðarligt gjald, varð stovnað í 2008 og er tann størsta av sínum slagi í heiminum.

Halda fram at gera íløgur

Felagið, sum byrjaði í Svøríki, men hvørs holdingfelag hevur heimstað í Luksemburg, hevur fleiri enn 30 milliónir haldarar

Hóast pengarnir frá haldum og lýsingum stroyma inn, so hevur felagið enn ikki havt yvirskot. Tað er heldur ikki ætlanin enn.

- Vit vænta, at vit fáa stórt yvirskot, so hvørt sum vit vaksa, sigur Spotify í eini fráboðan, sambært tíðindastovuni AFP. Felagið heldur fram at gera íløgur, sambært fráboðanini

Øll ikki so fegin um Spotify

Spotify hevur gjørt stórar íløgur í at nýtslurættindi til tónleikin. Eitt nú hevur felagið gjørt avtalu við KODA, ið umsitur meginpartin av tónleikinum hjá donskum, grønlendskum og føroyskum tónasmiðjum, um at selja brúksrættindi til tónleikin fyri eitt ávíst gjald.

Ikki øll eru so fegin um Spotify. Nøkur plátufeløg og tónleikarar nokta at loyva Spotify at fáa hendur á tónleikinum, tí tað ávirkar fløgusøluna og tey fáa ov lítið fyri tað.

Eitt nú Taylor Swift, Adele og Radiohead, og bæði kt-risin Apple og rapparin Jay-Z er komin við sínum stroymingartænastum, sum kappast við Spotify.