Danska ríkið krevur dupult so nógv av Norðpólinum

Danska ríkið fer at krevja dupult so nógv sum higartil er kravt av undirgrundini við Norðurpólin.

Nú ísurin á Norðurpólinum hvørvur, minka útlitini fyri einari semju í friði og náðum um, hvussu Norðurpólurin skal býtast millum londini, sum krevja part av honum.

Sambært tíðindastovuni Ritzau fer Danmark at krevja 400.000 ferkilometrar av havbotninum við Norðurpólin. 

Hetta er tvær ferðir so nógv sum Danmark higartil hevur kravt, skrivar blaðið Information, sum vísir til bókina "Balladen om Grønland" eftir danska journalistin Martin Breum. Bókin kemur út í dag.

Stjórnin váttar

Keldur í danska Uttanríkisráðnum hava váttað tíðindini í bókini hjá Martin Breum fyri Information. 

Danmark fer um stutta tíð at senda ST nýggja kravið hjá danska ríkinum. 

Orsøkin er, at Kanada í fjør breyt eina avtalu við Danmark um, hvussu markið millum Grønland og Kanada eigur at vera í framtíðini. 

Nýggja kravið hjá Danmark røkkur langt inn í økið, sum Kanada kannar sær. 

Grønland eigur ráevnini 

Grønland eigur rættin til ráevnini í grønlendsku undirgrundini og tí eisini rættin til partin hjá danska ríkinum við Norðurpólin.  

Í 2008 samdust Danmark og Grønland, Russland, Kanada, USA og Noreg um at áseta landamørkini á Norðurpólsleiðini í sátt og semju, men semja er tó ikki um sjálvan Norðurpólin.

Grønlendska landsstýrisforkvinnan, Aleqa Hammond, sigur við Information, at danska kongsríkið eigur at halda fast um síni krøv.

Norðurpólurin og Norðurpólsleiðin hava sera stóran týdning fyri framtíðina hjá Grønlandi, sigur Aleqa Hammond.