Kommunurnar fingu minni - og landskassin meir

Landskassin fekk meir inn í skatti fyrstu tveir mánaðirnar í ár, samanborið við í fjør, meðan kommunurnar fingu nakað minni í skatti.

Í fíggjarmálaráðnum kunnu tey gleðast um at meir kemur inn í landskassan, meðan kommunurnar fáa minni.

Sigmar Bláberg

01.03.2013 - 15:44

<div>Tað vísir ein uppgerð sum Taks hevur gjørt. Í januar og februar, fekk landskassin 198 miljónir kr. í skatti, og tað er tríggjar miljónir kr. meir enn somu mánaðir í fjør.</div><div><br></div><div>Skatturin av eftirlønum hækkaði 7,4 miljónir krónur, og kirkjuskatturin hækkaði 200.000 kr. Uppgerðin vísir eisini, at kommunurnar fingu 100.000 kr. minni í skatti fyrstu tveir mánaðirnar. </div><div><br></div><div>Tórshavnar kommuna fekk 2,4 miljónir krónur minni í skatti teir báðar mánaðirnar í ár, í mun til í fjør. Tórshavnar kommuna er stór, so minkingin var hálvttriðja prosent. Á Tvøroyri vignaðust januar og februar væl í ár, tí kommunan fekk 888.000 krónur meir í skatti, svarandi til næstan 12 prosent.</div><div><br></div><div>Í Hvannasundi minkaði inntøkan næstan 15 prosent, ella 266.000 krónur, og í Skopun minkaði inntøkan 222.000 krónur, ella góð 11 prosent.</div><div><br></div>