Várframsýning á Listasavni Føroya

Nógv fólk vóru komin saman, tá árliga Várframsýningin lat upp í dag. Bæði ung og gomul vóru komin at forvitnast, síggja nýggja og spennandi list, og nýta høvið at práta við fólk aftur við einum góðum bita.

Tað er felagið Føroysk Myndlistafólk, sum skipar fyri tiltakinum. Mentamálaráðharrin, Bjørn Kalsø, lat framsýningina upp. Eisini spældu Døgg Nónsgjógv og Allan Tausen nøkur løg, meðan fólk kundu síggja øll listaverkini.

Nógv ung

Framsýningin í ár er myndað av ymiskari tøkni. Har er alt frá skulpturum, installatión og ljóð, til málarí, grafik, video, foto og design. Tað eru 23 luttakandi listafólk við á framsýningini í ár. Tað eru nógv ung við, og níggju av teimum sýna fram fyri fyrstu ferð á Várframsýningini. 

Framsýningin er opin til 3. mai.

Síggj myndir frá tiltakinum niðanfyri.

Myndir: Gunnhild Persson