Yahya Hassan stillar upp

Ritzau skrivar, at 19 ára gamli yrkjarin, Yahya Hassan, nú ynskir at stilla upp til fólkatingið. 

Yahya Hassan ætlar at stilla upp fyri "Nationalpartiet" (Tjóðskaparflokkurin, red.), sum bleiv settur á stovn í novembur síðsta ár. 

Yahya Hassan sigur, at hann stillar upp fyri "Nationalpartiet" fyri at vera við til at savna ymiskleikan í samfelagnum. 

Formaðurin í flokkinum, Kashif Ahmad, sigur, at flokkurin er glaður og stoltur av, at Yahya velur at stilla upp fyri flokkin, og at hann er eitt frískt umboð til danskan politikk.

Nøkur av hjartamálunum hjá flokkinum eru at beina fyri 24-ára regluni, beina fyri tilknýtingskravinum, og at seta fleiri fólk í heilsuverkið. 

Flokkurin "Nationalpartiet" hevur tó enn ikki fingið heimild til at stilla upp til Fólkatingið. Yahya Hassan skrivar á Facebook síðu síni í dag, at nú mangla bara 5000 veljaraváttanir, til at flokkurin kann stilla upp.