16 stuttfilmar skulu kappast

Týsdagin 11. novembur var freistin úti til at senda stuttfilmar inn til árliga filmskvøldið í Norðurlandahúsinum 11. desembur.  Á filmskvøldinum verða nýggir føroyskir stuttfilmar sýndir, og teir bestu handaðir virðisløn. Í ár eru 16 filmar í uppskoti at vinna Geytan og Áskoðaravirðislønina. Hetta er triðja árið á rað, at Geytavirðislønin verður givin, og talið av stuttfilmum bara veksur. Í fjør vóru 14 filmar við og í ár eru tveir lagdir afturat.

Les eisini: Royn teg sum leikara í nýggjum filmi

í 2012 vann Sakaris Stóra Geytan við stuttfilminum Summarnátt, og Annika á Lofti vann Áskoðaravirðislønina fyri filmin Mist. Í fjør var tað Dávur Djurhuus, ið fór við Geytanum við filminum Terminal, og Áskoðaravirðislønina vann filmurin Munsch hjá Jónfinn Stenberg. Spennandi verður at vita, hvør fær virðislønirnar í ár.

Í filmsnevndini, sum skal velja Geytavinnaran, sita Birgir Kruse, formaður, Sif Gunnarsdóttir, Jan B. Jørgensen, Marjun Niclasen og útlendski nevndarlimurin hesaferð er Silje Engeness úr Noregi.