Beyoncé útgivið nýggja fløgu

Beyoncé Knowles tók øll á bóli tíðliga í morgun, tá hon brádliga gav út eina nýggja fløgu á iTunes saman við einum sjónbandi til hvønn sang. Fløgan, ið ber heitið BEYONCÉ, hevur 14 nýggjar sangir, ið lýsa eina meira persónliga síðu av sangarinnuni.

Á “Drunk in Love” syngur hon saman við manninum Jay Z, og á sanginum “Blue” stendur eingin minni enn skjótt tvey ára gamla dóttirin Blue Ivy sum viðsangari. Eisini fær hon hjálp frá Frank Ocean og Drake á sangunum “Superpower” og “Mine”.

Fjepparar hjá Beyoncé hava víst sína nøgd á Twitter, har eyðkennið “Blue Ivy” liggur ovast av eyðkennisorðum, og sjálv sigur Beyoncé, at henda fløgan varð framleidd beinleiðis til fjeppararnar, og tí kom hon beinleiðis út á internetið,heldur enn í handlarnar. Altjóða miðlar rósa fløguni, sum eisini hevur fingið stjørnur sum Katy Perry og Lady Gaga at senda rósandi tweets.

Sangirnir og sjónbondini kunnu keypast á iTunes.