OL-nevndin sigur ikki Putin ímóti

Rannvá Egholm

rannva@roddin.fo

7. til 23. februar 2014 verða teir Olympisku vetrarleikirnir leiktir í býnum í Sotjii í Russlandi. Hetta var avgjørt tann 5. juli í 2007, og nú seks ár eru liðin síðan avgerðina, eru viðurskiftini í Russlandi broytt. Men hetta metir OL-nevndin ikki vera týdningarmikið, og hava tey tikið støðu til, at viðurskiftini í Russlandi ikki bróta nakra reglugerð hjá Olympisku leikunum. Hetta skrivar AllOut, sum er ein felagsskapur á netinum, ið berjist fyri javnrættindum, á sínari heimasíðu.

Forboðið í Russlandi gongur í stuttum út uppá, at tað er ólógligt at útala seg um rættindini hjá teimum samkyndu, at gera mótmælisgongur ella at geva ómyndigum upplýsingar um LGBT. Um mann ikki fylgir hesum reglum, so kann mann fáa upp til 2 vikur í varðhaldi ella eina bót upp á 130.000 krónur. Hendan revsingin er ikki bara galdandi fyri russar, men ferðafólk kunnu eisini verða blakað úr landinum, um tey gera brót á lógina.

Vertirnir fyri teimum Olympisku leikunum eiga at halda sjey høvuðsreglar, og høvuðsregul nummar seks er, at mann má ikki gera mismun av nøkrum slagi. OL-nevndin vil ikki verða við, at Russland ger nakað skeivt við teirra forboði ímóti samkyndum.