Listamaður lumpar tónleikafjepparar við følskum plakatum

Kundi tú hugsað tær at sloppið á konsert hjá Daft Punk, Justice, Kanye West ella kanska Beastie Boys? Seinastu mánaðirnar hava meira enn 3000 plakatir verið at sæð í stórbýum sum New York, Los Angeles, London og París, sum hava vakt stóran áhuga millum tónleikafjepparar.

Plakatirnar kunngjørdu fleiri ymiskar spæliskráir við nøkrum av størstu og mest umbidnu tónleikanøvnunum í heiminum.

Sambært einari plakat skuldu Daft Punk, Air, Justice, Kavinsky v. fl. spæla í París, meðan Kanye West, Jay-Z, Dr. Dre og onnur skuldu spæla í Madison Square Garden í New York.

Ljóðar tað ov gott til at vera satt? Tað er tað eisini. Handan mongu plakatirnar eru nevniliga franski graffiti-listamaðurin André Saraiva og klædnamerkið Maison Kitsuné. Plakatirnar eru partur av eini lýsingarherferð í samband við, at Maison Kitsuné letur ein nýggjan handil upp í Tokyo 4. septembur, har plakatirnar eisini verða sýndar fram sum listaframsýning við heitinum Dream Concerts Art Show, skrivar style.com.

Hóast fleiri av nøvnunum á plakatunum vóru stavað skeivt, konsertin í París stóð at vera í einum bygningi, sum brendi niður í 2011, og onki árstal stóð aftaná dagfestingarnar, ringdu fólk í hópatali til konsertstøðini, tí tey vildu ogna sær atgongumerki.